1. Khuddakapathapali - Pali (1) BJT

Khuddakapāṭhapāḷi

Suttantapiṭake

Khuddakanikāyo

Khuddakapāṭhapāḷi

Namo tassa Bhagavato Arahato Sammāsambuddhassa
Namo tassa Bhagavato Arahato Sammāsambuddhassa
Namo tassa Bhagavato Arahato Sammāsambuddhassa

1: Saraṇagamanaṃ ¹

Buddhaṃ saraṇaṃ gacchāmi
Dhammaṃ saraṇaṃ gacchāmi
Saṅghaṃ saraṇaṃ gacchāmi

Dutiyam-pi Buddhaṃ saraṇaṃ gacchāmi
Dutiyam-pi dhammaṃ saraṇaṃ gacchāmi
Dutiyam-pi saṅghaṃ saraṇaṃ gacchāmi

Tatiyam-pi Buddhaṃ saraṇaṃ gacchāmi
Tatiyam-pi dhammaṃ saraṇaṃ gacchāmi
Tatiyam-pi saṅghaṃ saraṇaṃ gacchāmi

Saraṇagamanaṃ

2: Dasasikkhāpadaṃ

Pāṇātipātā veramaṇīsikkhāpadaṃ samādiyāmi.
Adinnādānā veramaṇīsikkhāpadaṃ samādiyāmi.
Abrahmacariyā veramaṇīsikkhāpadaṃ samādiyāmi.
Musāvādā veramaṇīsikkhāpadaṃ samādiyāmi.
Surāmerayamajjapamādaṭṭhānā veramaṇīsikkhāpadaṃ samādiyāmi.
Vikālabhojanā veramaṇīsikkhāpadaṃ samādiyāmi.
Naccagītavāditavisūkadassanā veramaṇīsikkhāpadaṃ samādiyāmi.
Mālāgandhavilepanadhāraṇamaṇḍanavibhūsanaṭṭhānā veramaṇīsikkhāpadaṃ samādiyāmi.
Uccāsayanamahāsayanā veramaṇīsikkhāpadaṃ samādiyāmi.

[PTS Page 002] [\q 2/]

Jātarūparajatapaṭiggahaṇā veramaṇīsikkhāpadaṃ samādiyāmi.

Dasasikkhāpadaṃ

[BJT Page 004] [\x 004/]

3: Dvattiṃsākāraṃ

Atthi imasmiṃ kāye:
kesā, lomā, nakhā, dantā, taco,
maṃsaṃ, nahārū, aṭṭhi, aṭṭhimiñjaṃ, ² vakkaṃ,
hadayaṃ, yakanaṃ, kilomakaṃ, pihakaṃ, papphāsaṃ,
antaṃ, antaguṇaṃ, udariyaṃ, karīsaṃ,
pittaṃ, semhaṃ, pubbo, lohitaṃ, sedo, medo,
assu, vasā, khelo, siṅghānikā, lasikā, muttaṃ,
matthake matthaluṅgan-ti.

Dvattiṃsākāraṃ

4: Kumārapañhā

Ekaṃ nāma kiṃ? ³             Sabbe sattā āhāraṭṭhitikā.
Dve nāma kiṃ?                 Nāmañ-ca rūpañ-ca.
Tīṇi nāma kiṃ?                 Tisso vedanā.
Cattāri nāma kiṃ?             Cattāri ariyasaccāni.
Pañca nāma kiṃ?              Pañcupādānakkhandhā.
Cha nāma kiṃ?                 Cha ajjhattikāni āyatanāni.
Satta nāma kiṃ?               Satta bojjhaṅgā.
Aṭṭha nāma kiṃ?              Ariyo aṭṭhaṅgiko maggo.
Nava nāma kiṃ?              Nava sattāvāsā.
Dasa nāma kiṃ?               Dasahaṅgehi samannāgato Arahāti vuccatī-ti.

Kumārapañhā

[BJT Page 006] [\x 006/]

5: Maṅgalasuttaṃ

Evaṃ me sutaṃ:
ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme. Atha kho aññatarā devatā abhikkantāya rattiyā, abhikkantavaṇṇā kevalakappaṃ Jetavanaṃ obhāsetvā, yena Bhagavā tenupasaṅkami, upasaṅkamitvā Bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho sā devatā Bhagavantaṃ gāthāya ajjhabhāsi:

[PTS Page 003] [\q 3/]

1. “Bahū devā manussā ca ~ maṅgalāni acintayuṃ
Ākaṅkhamānā sotthānaṃ: ~ brūhi maṅgalam-uttamaṃ.”

2. “Asevanā ca bālānaṃ, ~ paṇḍitānañ-ca sevanā,
Pūjā ca pūjanīyānaṃ: ~ etaṃ maṅgalam-uttamaṃ.

3. Patirūpadesavāso ca, ~ pubbe ca katapuññatā,
Attasammāpaṇidhi ca: ~ etaṃ maṅgalam-uttamaṃ.

4. Bāhusaccañ-ca sippañ-ca, ~ vinayo ca susikkhito,
Subhāsitā ca yā vācā: ~ etaṃ maṅgalam-uttamaṃ.

5. Mātāpituupaṭṭhānaṃ, ~ puttadārassa saṅgaho,
Anākulā ca kammantā: ~ etaṃ maṅgalam-uttamaṃ.

6. Dānañ-ca dhammacarⁱyā ca, ~ ñātakānañ-ca saṅgaho,
Anavajjāni kammāni: ~ etaṃ maṅgalam-uttamaṃ.

7. Ārati virati pāpā, ~ majjapānā ca saññamo,
Appamādo ca dhammesu: ⁴ ~ etaṃ maṅgalam-uttamaṃ.

8. Gāravo ca nivāto ca, ~ santuṭṭhī ca kataññutā,
Kālena dhammasavaṇaṃ: ~ etaṃ maṅgalam-uttamaṃ.

9. Khantī ca sovacassatā, ~ samaṇānañ-ca dassanaṃ,
Kālena dhammasākacchā: ~ etaṃ maṅgalam-uttamaṃ.

10. Tapo ca brahmacarⁱyañ-ca, ~ arⁱyasaccānadassanaṃ,
Nibbāṇa sacchikirⁱyā ca: ~ etaṃ maṅgalam-uttamaṃ.

[BJT Page 008] [\x 008/]

11. Phuṭṭhassa lokadhammehi, ~ cittaṃ yassa na kampati,
Asokaṃ virajaṃ khemaṃ: ~ etaṃ maṅgalam-uttamaṃ.

12. Etādisāni katvāna, ~ sabbattham-aparājitā,
Sabbattha sotthiṃ gacchanti: ~ taṃ tesaṃ maṅgalam-uttaman” ti.

Maṅgalasuttaṃ

6: Ratanasuttaṃ

1. Yānīdha bhūtāni samāgatāni,
Bhummāni vā yāni va antaḷikkhe,
Sabbe va bhūtā sumanā bhavantu,
Atho pi sakkacca suṇantu bhāsitaṃ. ⁵

2. Tasmā hi bhūtā nisāmetha sabbe,
Mettaṃ karotha mānusiyā pajāya,
Divā ca ratto ca haranti ye baliṃ,
Tasmā hi ne rakkhatha appamattā.

3. Yaṃ kiñci vittaṃ idha vā huraṃ vā

[PTS Page 004] [\q 4/]

Saggesu vā yaṃ ratanaṃ paṇītaṃ
Na no samaṃ atthi Tathāgatena
Idam-pi Buddhe ratanaṃ paṇītaṃ:
Etena saccena suvatthi hotu! ⁶

4. Khayaṃ virāgaṃ amataṃ paṇītaṃ
Yad-ajjhagā Sakyamunī samāhito
Na tena dhammena samatthi kiñci
Idam-pi dhamme ratanaṃ ⁷ paṇītaṃ:
Etena saccena suvatthi hotu!

5. Yam-Buddhaseṭṭho parivaṇṇayī suciṃ
Samādhim-ānantarikañ-ñam-āhu
Samādhinā tena samo na vijjati
Idam-pi dhamme ratanaṃ paṇītaṃ:
Etena saccena suvatthi hotu! ⁸

[BJT Page 010] [\x 010/]

6. Ye puggalā aṭṭha satam-pasatthā
Cattāri etāni yugāni honti
Te dakkhiṇeyyā Sugatassa sāvakā,
Etesu dinnāni mahapphalāni
Idam-pi saṅghe ratanaṃ paṇītaṃ:
Etena saccena suvatthi hotu! ⁹

7. Ye suppayuttā manasā daḷhena
Nikkāmino Gotamasāsanamhi
Te pattipattā amataṃ vigayha
Laddhā mudhā nibbutiṃ bhuñjamānā
Idam-pi saṅghe ratanaṃ paṇītaṃ:
Etena saccena suvatthi hotu! ¹⁰

8. Yathindakhīlo paṭhaviṃ sito siyā
Catubbhi vātebhi asampakampiyo,
Tathūpamaṃ sappurisaṃ vadāmi,
Yo arⁱyasaccāni avecca passati
Idam-pi saṅghe ratanaṃ paṇītaṃ:
Etena saccena suvatthi hotu! ¹¹

9. Ye arⁱyasaccāni vibhāvayanti,
Gambhīrapaññena sudesitāni,
Kiñcāpi te honti bhus'appamattā
Na te bhavaṃ aṭṭhamam-ādiyanti
Idam-pi saṅghe ratanaṃ paṇītaṃ:
Etena saccena suvatthi hotu! ¹²

[BJT Page 012] [\x 012/]
[PTS Page 005] [\q 5/]

10. Sahā vassa dassanasampadāya
Tayassu dhammā jahitā bhavanti:
Sakkāyadiṭṭhi vicikicchitañ-ca
Sīlabbataṃ vā pi yad-atthi kiñci.
Catūhapāyehi ca vippamutto,
Cha cābhiṭhānāni abhabbÖ kātuṃ
Idam-pi saṅghe ratanaṃ paṇītaṃ:
Etena saccena suvatthi hotu! ¹³

11. Kiñcāpi so kammaṃ karoti pāpakaṃ
Kāyena vācā uda cetasā vā,
AbhabbÖ so tassa paṭicchādāya:
Abhabbatā diṭṭhapadassa vuttā
Idam-pi saṅghe ratanaṃ paṇītaṃ:
Etena saccena suvatthi hotu! ¹⁴

12. Vanappagumbe yathā phussitagge
Gimhāṇa māse paṭhamasmiṃ gimhe,
Tathūpamaṃ dhammavaraṃ adesayī,
Nibbāṇagāmiṃ paramaṃhitāya
Idam-pi Buddhe ratanaṃ paṇītaṃ:
Etena saccena suvatthi hotu! ¹⁵

13. Varo varaññū varado varāharo,
Anuttaro dhammavaraṃ adesayī
Idam-pi Buddhe ratanaṃ paṇītaṃ:
Etena saccena suvatthi hotu!

14. Khīṇaṃ purāṇaṃ navaṃ natthi sambhavaṃ,
Virattacittā āyatike bhavasmiṃ,
Te khīṇabījā avirūḷhichandā,
Nibbanti dhīrā yathāyam-padīpo
Idam-pi saṅghe ratanaṃ paṇītaṃ:
Etena saccena suvatthi hotu! ¹⁶

[BJT Page 014] [\x 014/]

15. Yānīdha bhūtāni samāgatāni,
Bhummāni vā yāni va antaḷikkhe,
Tathāgataṃ devamanussapūjitaṃ
Buddhaṃ namassāma suvatthi hotu!

[PTS Page 006] [\q 6/]

16. ¹⁷ Yānīdha bhūtāni samāgatāni,
Bhummāni vā yāni va antaḷikkhe,
Tathāgataṃ devamanussapūjitaṃ
Dhammaṃ namassāma suvatthi hotu!

17. Yānīdha bhūtāni samāgatāni,
Bhummāni vā yāni va antaḷikkhe,
Tathāgataṃ devamanussapūjitaṃ
Saṅghaṃ namassāma suvatthi hotu! ¹⁸

Ratanasuttaṃ

7: Tirokuḍḍasuttaṃ

1. Tirokuḍḍesu tiṭṭhanti, ~ sandhisiṅghāṭakesu ca,
Dvārabāhāsu tiṭṭhanti, ~ āgantvāna sakaṃ gharaṃ.

2. Pahute annapānamhi, ~ khajjabhojje upaṭṭhite,
Na tesaṃ koci sarati ~ sattānaṃ kammapaccayā.

3. Evaṃ dadanti ñātīnaṃ ~ ye honti anukampakā,
Suciṃ paṇītaṃ kālena, ~ kappiyaṃ pānabhojanaṃ.

4. “Idaṃ vo ñātinaṃ hotu, ~ sukhitā hontu ñātayo!”
Te ca tattha samāgantvā, ~ ñātipetā samāgatā,

5. Pahute annapānamhi, ~ sakkaccaṃ anumodare:
“Ciraṃ jīvantu no ñātī! ~ Yesaṃ hetu labhāmase,
Amhākañ-ca katā pūjā, ~ dāyakā ca anipphalā!”

6. Na hi tattha kasī atthi, ~ gorakkhettha na vijjati,
Vaṇijjā tādisī natthi, ~ hiraññena kayākkayaṃ.
Ito dinnena yāpenti, ~ petā kālakatā tahiṃ.

7. Unname udakaṃ vaṭṭhaṃ, ¹⁹ ~ yathā ninnaṃ pavattati,
Evam-eva ito dinnaṃ, ~ petānaṃ upakappati.

[BJT Page 016] [\x 016/]

8. Yathā vārivahā pūrā ~ paripūrenti sāgaraṃ,
Evam-eva ito dinnaṃ, ~ petānaṃ upakappati.

9. “Adāsi me, akāsi me, ~ ñātimittā sakhā ca me,”
Petānaṃ dakkhiṇaṃ dajjā, ~ pubbe katamanussaraṃ.

10. Na hi runnaṃ va, soko vā, ~ yā caññā paridevanā,
Na taṃ petānam-atthāya, ~ evaṃ tiṭṭhanti ñātayo.

11. Ayaṃ kho dakkhiṇā dinnā, ~ saṅghamhi suppatiṭṭhitā,
Dīgharattaṃ hitāyassa, ~ ṭhānaso upakappati.

12. So ñātidhammo ca ayaṃ nidassito
Petānapūjā ca katā uḷārā,
Balañ-ca bhikkhūnam-anuppadinnaṃ,
Tumhehi puññaṃ pasutaṃ anappakaṃ!

Tirokuḍḍasuttaṃ

[PTS Page 007] [\q 7/]

8: Nidhikaṇḍasuttaṃ

1. Nidhiṃ nidheti puriso ~ gambhīre odakantike:
“Atthe kicce samuppanne ~ atthāya me bhavissati,

2. Rājato vā duruttassa, ~ corato pīḷitassa vā,
Iṇassa vā pamokkhāya, ~ dubbhikkhe āpadāsu vā”.
Etad-atthāya lokasmiṃ ~ nidhi nāma nidhīyati.

3. Tāva sunihito ²⁰ santo ~ gambhīre odakantike,
Na sabbo sabbadā eva ²¹ ~ tassa taṃ upakappati,

[BJT Page 018] [\x 018/]

4. Nidhi vā ṭhānā cavati, ~ saññā vāssa vimuyhati,
Nāgā vā apanāmenti, ~ yakkhā vā pi haranti naṃ,

5. Appiyā vā pi dāyādā ~ uddharanti apassato,
Yadā puññakkhayo hoti ~ sabbam-etaṃ vinassati.

6. Yassa dānena sīlena, ~ saṃyamena damena ca,
Nidhī sunihito hoti, ~ itthiyā purisassa ²² vā,

7. Cetiyamhi ²³ va saṅghe vā, ~ puggale atithīsu vā,
Mātari pitari vā pi, ~ atho jeṭṭhamhi bhātari,

8. ²⁴ Eso nidhī sunihito, ~ ajeyyo anugāmiko.
Pahāya gamanīyesu, ~ etaṃ ādāya gacchati.

9. Asādhāraṇam-aññesaṃ, ~ acoraharaṇo nidhi,
Kayirātha dhīro puññāni, ~ yo nidhī anugāmiko.

10. Esa devamanussānaṃ ~ sabbakāmadado nidhi,
Yaṃ yad-evābhipatthenti ~ sabbam-etena labbhati.

11. Suvaṇṇatā, sussaratā, ~ susaṇṭhānasurūpatā, Ādhipacca parivāraṃ, ~ sabbam-etena labbhati.

12. Padesarajjaṃ, issarⁱyaṃ, ~ cakkavattisukham-piyaṃ,
Devarajjam-pi dibbesu, ~ sabbam-etena labbhati.

13. Mānusikā ca sampatti, ~ devaloke ca yā rati,
Yā ca Nibbāṇasampatti, ~ sabbam-etena labbhati.

14. Mittasampadam-āgamma, ~ yoniso ca payuñjato,
Vijjā vimutti vasībhāvo ~ sabbam-etena labbhati.

[BJT Page 020] [\x 020/]

15. Paṭisambhidā, vimokkhā ca, ~ yā ca sāvakapāramī,
PaccekaBodhi, Buddhabhūmi, ~ sabbam-etena labbhati.

16. Evaṃ mah'atthikā esā, ~ yad-idaṃ puññasampadā,
Tasmā dhīrā pasaṃsanti ~ paṇḍitā katapuññataṃ.

Nidhikaṇḍasuttaṃ .

[PTS Page 008] [\q 8/]

9: Mettasuttaṃ

1. Karaṇīyam-atthakusalena, ~ yan-taṃ santaṃ padaṃ abhisamecca:
Sakko ujū ca sūjū ca, ~ suvaco cassa mudu anatimānī,

2. Santussako ca subharo ca, ~ appakicco ca sallahukavutti,
Santindriyo ca nipako ca, ~ appagabbho kulesu ananugiddho,

3. Na ca khuddaṃ samācare kiñci ~ yena viññū pare upavadeyyuṃ.
“Sukhino vā khemino hontu, ~ sabbe sattā bhavantu sukhitattā!

4. Ye keci pāṇabhūtatthi ~ tasā vā thāvarā vā anavasesā, Dīghā vā ye mahantā vā, ~ majjhimā rassakāṇukathūlā,

5. Diṭṭhā vā ye va addiṭṭhā, ~ ye ca dūre vasanti avidūre,
Bhūtā vā sambhavesī vā ~ sabbe sattā bhavantu sukhitattā!”

[BJT Page 022] [\x 022/]

6. Na paro paraṃ nikubbetha, ~ nātimaññetha katthaci naṃ kañci,
Byārosanā paṭighasaññā ~ nāññamaññassa dukkham-iccheyya.

7. Mātā yathā niyaṃ puttaṃ ~ āyusā ekaputtam-anurakkhe,
Evam-pi sabbabhūtesu ~ mānasaṃ bhāvaye aparimāṇaṃ,

8. Mettañ-ca sabbalokasmiṃ ~ mānasaṃ bhāvaye aparimāṇaṃ,
Uddhaṃ adho ca tiriyaṃ ca, ~ asambādhaṃ averaṃ asapattaṃ.

9. Tiṭṭhaṃ caraṃ nisinno vā, ~ sayāno vā yāvatassa vigatamiddho,
Etaṃ satiṃ adiṭṭheyya, ~ Brahmam-etaṃ vihāraṃ idha-m-āhu.

[PTS Page 009] [\q 9/]

10. Diṭṭhiñ-ca anupagamma, ~ sīlavā dassanena sampanno,
Kāmesu vineyya gedhaṃ, ~ na hi jātu gabbhaseyyaṃ puna-r-etī-ti.

Mettasuttaṃ

Khuddakapāṭhapāḷi Niṭṭhito

End Notes

1 BJT note: Saraṇattayaṃ - ChS.

2 BJT note: Aṭṭhimiñjā - seen somewhere.

3 BJT note: Eka nāma kiṃ? - in some books.

4 Editor's note: BJT, dhammesū

5 BJT note:

Yānīdha bhūtānī samāgatāni
Bhumyāni vā yāni vā antarīkùe
Sarvāṇī vā āttamanāti bhūtvā
ørūṇavantu svastyayanaṃ jinena bhāùitam - (Mahāvastu).

6 BJT note:

Imasmiṃ loke parasamiṃ vā punaþ
Sarveùu vā yad-ratanaṃ praṇītam
Na tatsamaṃ asti Tathāgatena
Devātidevena narottamena
Idam-pi Buddhe ratanaṃ praṇītaṃ
Etena satyena susvasti hotu - (Mahāvastu).

7 Editor's note: BJT, ratna, by mistake

8 BJT note:

Yam-Buddha÷reùṭho parivarṇayet ÷uciṃ
Yam-āhu ānantarikaṃ samādhiṃ
Samādhino tasya samo na vidyate
Idam-pi dharme ratanaṃ praṇītaṃ
Etena satyena susvasti hotu - (Mahāvastu).

9 BJT note:

Ye pudgalā aùṭa sadā pra÷astā
Catvāri etāni yugāni bhonti
Te dakùīṇeyā Sugatena uktā
Eteùu dinnāni mahatphalāni
Idam-pi saṅghe ratanaṃ praṇītaṃ
Etena. . . - (Mahāvastu).

10 BJT note:

Ye yuktayogī manasā suchandasā
Naiùkāmyino Gautama÷āsanasmin
Te prāptiprāptā amçtaṃ vagāhya
Vimuktacittā nirvritiṃ bhuṃjamānāþ
Idampi saṅghe. . . - (Mahāvastu).

11 BJT note:

Yathendrakīlo pçthivi÷rito syā-
ccatūrhi vātebhi asamprakampī
Tathopamaṃ satpuruùaṃ vademi
Yo āryasatyāni sude÷itāni
Gambhīra arthāni avetya pa÷yati
Idam-pi . . - (Mahāvastu).

12 BJT note:

Ye āryasatyāni vibhāvayanti
Gambhīrapragñena sude÷itāni
Kiñcāpi te bhonti bhā÷aṃ pramattā
Na te bhavānaùṭa upādiyantī
Idam-pi saṅghe. . . . - (Mahāvastu).

13 BJT note:

Sahaiva yasya dar÷anasampadāya.
Trayosya dharmā jahitā bhavanti
Sattāyadçùṭiṃ vicikitsitaṃ ca
øīlavrataṃ vā pi yad-asti kiñcit
Idam-pi saṅghe. . . - (Mahāvastu).

14 BJT note:

Kiñcāpi ÷aikùo prakaroti pāpaṃ
Kāyena vācā atha cetasā pi
Abhavyo so tasya niguhanāya
Abhavyatā dçùṭipatheùu uktā
Idam-pi saṅghe. . . - (Mahāvastu).

15 BJT note:

Vane pragulmā yatha puùpitāgrā
ørīùmāṇamāse prathame caitrasmin
Vāteritā te surabhiṃ pravānti
Evaṃvidhā dhyāyino Buddhaputrāþ
øīlenupetā surabhiṃ pravānti
Idam-pi saṅghe. . . - (Mahāvastu).

16 BJT note:

Kùīṇaṃ purāṇaṃ navo nāsti saṃcayo
Vimuktacittā āyatike bhavasmin
Te kùīṇabījā avirūḍhidharmā
Nirvānti dhīrā yathā tailadīpāþ
Idam-pi saṅghe ratanaṃ praṇītaṃ
Etena saccena susvasti bhotu - (Mahāvastu).

17 Editor's note: BJT doesn't number the last two verses seperately, presumably by mistake.

18 BJT note:

Vipa÷yismiṃ vi÷vabhucikrakucchande
Bhāmakanakamunismiṃ Kā÷yape
Mahāya÷e øākyamunismiṃ Gautame
Etesu Buddheùu maharyikeùu
Yā devatā santi abhiprasannā
Vaṭham-pi tā rakùantu ca karontu
Svasatyayanaṃ mānuùiyā prajāyai
Yo dharmacakraṃ abhibhūya lokaṃ
Pravartyati sarvabhūtānukam-pi
Etādra÷aṃ devamanuùya÷reùṭhaṃ
Buddhaṃ namasyāma susvasti bhotu
Dharmaṃ namasyāma susvasti bhotu
Saṅghaṃ namasyāma susvasti bhotu - (Mahāvastu).

19 BJT note: Vuṭṭhaṃ - palm leaf book.

20 BJT note: Tāvassunihito - in some books.

21 Editor's note: BJT, eca, by mistake

22 Editor's note: BJT, purissa, an example of haplography

23 BJT note: Taṃ panetaṃ tividhaṃ hoti paribhogacetiyaṃ, uddissakacetiyaṃ, dhātucetiyan-ti. Tattha bodhirukkho paribhogacetiyaṃ, Buddhapaṭimā uddissakacetiyaṃ, dhātugabbhathupā sadhātukā dhātucetiyaṃ - commentary.

24 Editor's note: BJT prints numbers 8 & 9 in the wrong order