Udanapali - 6: Jaccandhavaggo

Home Page First Sutta Next Vagga

Udānapāḷi 6: Jaccandhavaggo

Table of Contents

6-1: Āyusaṅkhāravossajanasuttaṃ

6-2: Jaṭilasuttaṃ

6-3: Paccavekkhanasuttaṃ

6-4: Paṭhamanānātitthiyasuttaṃ

6-5: Dutiyanānātitthiyasuttaṃ

6-6: Tatiyanānātitthiyasuttaṃ

6-7: Subhūtisuttaṃ

6-8: Gaṇikāsuttaṃ

6-9: Upātisuttaṃ

6-10: Tathāgatuppādasuttaṃ

[BJT Page 250] [\x 250/]
[PTS Page 062] [\q 62/]

Jaccandhavaggo chaṭṭho.

6-1: Āyusaṅkhāravossajanasuttaṃ (51)

1. Evaṃ me sutaṃ: ekaṃ samayaṃ Bhagavā Vesāliyaṃ viharati Mahāvane Kūṭāgārasālāyaṃ. Atha kho Bhagavā pubbanhasamayaṃ nivāsetvā pattacīvaram-ādāya Vesāliṃ piṇḍāya pāvisi. Vesāliyaṃ piṇḍāya caritvā pacchābhattaṃ piṇḍapātapaṭikkanto āyasmantaṃ Ānandaṃ āmantesi: “gaṇhāhi Ānanda nisīdanaṃ, yena Cāpālaṃ cetiyaṃ tenupasaṅkamissāma ¹ divā vihārāyā”-ti. “Evaṃ bhante” ti kho āyasmā Ānando Bhagavato paṭissutvā nisīdanam-ādāya Bhagavantaṃ piṭṭhito piṭṭhito anubandhi. Atha kho Bhagavā yena Cāpālaṃ cetiyaṃ tenupasaṅkami, upasaṅkamitvā paññatte āsane nisīdi. Nisajja kho ² Bhagavā āyasmantaṃ Ānandaṃ āmantesi: “ramaṇīyā Ānanda Vesālī, ramaṇīyaṃ Udenaṃ cetiyaṃ, ramaṇīyaṃ Gotamakaṃ cetiyaṃ, ramaṇīyaṃ Sattambaṃ cetiyaṃ, ramanīyaṃ Bahuputtaṃ cetiyaṃ, ramaṇīyaṃ Sārandadaṃ cetiyaṃ, ramaṇīyaṃ Cāpālaṃ cetiyaṃ. Yassa kassaci Ānanda cattāro iddhipādā bhāvitā bahulīkatā yānīkatā vatthukatā anuṭṭhitā paricitā susamāraddhā, so ākaṅkhamāno kappaṃ vā tiṭṭheyya kappāvasesaṃ vā. Tathāgatassa kho Ānanda cattāro iddhipādā bhāvitā bahulīkatā yānīkatā vatthukatā anuṭṭhitā paricitā susamāraddhā. Ākaṅkhamāno Ānanda Tathāgato kappaṃ vā tiṭṭheyya kappāvasesaṃ vā” ti. Evam-pi kho āyasmā Ānando Bhagavatā oḷārike nimitte kayiramāne oḷārike obhāse kayiramāne nāsakkhi paṭivijjhituṃ. Na Bhagavantaṃ yāci: “tiṭṭhatu bhante Bhagavā kappaṃ, tiṭṭhatu Sugato kappaṃ, bahujanahitāya bahujanasukhāya lokānukampāya atthāya hitāya sukhāya devamanussānan”-ti. Yathā taṃ Mārena pariyuṭṭhitacitto.

[PTS Page 063] [\q 63/]

Dutiyam-pi kho Bhagavā āyasmantaṃ Ānandaṃ āmantesi: “ramaṇīyā Ānanda Vesālī, ramaṇīyaṃ Udenaṃ cetiyaṃ, ramaṇīyaṃ Gotamakaṃ cetiyaṃ, ramaṇīyaṃ Sattambaṃ cetiyaṃ, ramaṇīyaṃ Bahuputtaṃ cetiyaṃ, ramaṇīyaṃ Sārandadaṃ cetiyaṃ, ramaṇīyaṃ Cāpālaṃ cetiyaṃ. Yassa kassaci Ānanda cattāro iddhipādā bhāvitā bahulīkatā yānīkatā vatthukatā anuṭṭhitā paricitā susamāraddhā, so ākaṅkhamāno kappaṃ vā tiṭṭheyya kappāvasesaṃ vā. Tathāgatassa kho Ānanda cattāro iddhipādā bhāvitā bahulīkatā yānīkatā vatthukatā anuṭṭhitā paricitā susamāraddhā. Ākaṅkhamāno Ānanda Tathāgato kappaṃ vā tiṭṭheyya kappāvasesaṃ vā” ti. Evam-pi kho āyasmā Ānando Bhagavatā oḷārike nimitte kayiramāne oḷārike obhāse kayiramāne nāsakkhi paṭivijjhituṃ, na Bhagavantaṃ yāci: “tiṭṭhatu bhante Bhagavā kappaṃ, tiṭṭhatu Sugato kappaṃ, bahujanahitāya bahujanasukhāya lokānukampāya atthāya hitāya sukhāya devamanussānan”-ti. Yathā taṃ Mārena pariyuṭṭhitacitto. Tatiyam-pi kho Bhagavā āyasmantaṃ Ānandaṃ āmantesi: “ramaṇīyā Ānanda Vesālī, ramaṇīyaṃ Udenaṃ cetiyaṃ, ramaṇīyaṃ Gotamakaṃ cetiyaṃ, ramaṇīyaṃ Sattambaṃ cetiyaṃ, ramaṇīyaṃ Bahuputtaṃ cetiyaṃ, ramaṇīyaṃ Sārandadaṃ cetiyaṃ, ramaṇīyaṃ Cāpālaṃ cetiyaṃ. Yassa kassaci Ānanda cattāro iddhipādā bhāvitā bahulīkatā yānīkatā vatthukatā anuṭṭhitā paricitā susamāraddhā, so ākaṅkhamāno kappaṃ vā tiṭṭheyya kappāvasesaṃ vā. Tathāgatassa kho Ānanda cattāro iddhipādā bhāvitā bahulīkatā yānīkatā vatthukatā anuṭṭhitā paricitā susamāraddhā. Ākaṅkhamāno Ānanda Tathāgato kappaṃ vā tiṭṭheyya kappāvasesaṃ vā” ti. Evam-pi kho āyasmā Ānando Bhagavatā oḷārike nimitte kayiramāne oḷārike obhāse kayiramāne nāsakkhi paṭivijjhituṃ. Na Bhagavantaṃ yāci: tiṭṭhatu bhante Bhagavā kappaṃ, tiṭṭhatu Sugato kappaṃ, bahujanahitāya bahujanasukhāya lokānukampāya atthāya hitāya sukhāya devamanussānan-ti. Yathā taṃ Mārena pariyuṭṭhitacitto.

2. Atha kho Bhagavā āyasmantaṃ Ānandaṃ āmantesi: “gaccha tvaṃ Ānanda yassa dāni kālaṃ maññasī”-ti.“Evaṃ bhante” ti kho āyasmā Ānando Bhagavato paṭissutvā uṭṭhāyāsanā Bhagavantaṃ abhivādetvā padakkhiṇaṃ katvā avidūre aññatarasmiṃ rukkhamūle nisīdi.

[BJT Page 252] [\x 252/]

3. Atha kho Māro pāpimā acirapakkante āyasmante Ānande yena Bhagavā tenupasaṅkami, upasaṅkamitvā ekamantaṃ aṭṭhāsi. Ekamantaṃ ṭhito kho Māro pāpimā Bhagavantaṃ etad-avoca: “parinibbātu ³ bhante Bhagavā, parinibbātu Sugato, parinibbānakālo dāni bhante Bhagavato. Bhāsitā kho panesā bhante Bhagavatā vācā: “na tāvāhaṃ pāpima, parinibbāyissāmi yāva me bhikkhū na sāvakā bhavissanti, viyattā vinītā visāradā yogakkhemā bahussutā dhammadharā dhammānudhammapaṭipannā sāmīcipaṭipannā anudhammacārino sakaṃ ⁴ ācariyakaṃ uggahetvā ācikkhissanti desessanti paññapessanti paṭṭhapessanti vivarissanti vibhajissanti uttānī karissanti uppannaṃ parappavādaṃ sahadhammena suniggahitaṃ niggahetvā sappāṭihāriyaṃ dhammaṃ desessantī”-ti.

Santi kho pana bhante etarahi bhikkhū Bhagavato sāvakā viyattā vinītā visāradā yogakkhemā bahussutā dhammadharā dhammānudhammapaṭipannā sāmīcipaṭipannā anudhammacārino, sakaṃ ācariyakaṃ uggahetvā ācikkhanti desenti paññapenti paṭṭhapenti vivaranti vibhajanti uttāniṃ karonti uppannaṃ parappavādaṃ sahadhammena suniggahitaṃ niggahetvā sappāṭihāriyaṃ dhammaṃ desenti. Parinibbātu bhante Bhagavā, parinibbātu Sugato, parinibbānakālo dāni bhante Bhagavato.

4. Bhāsitā kho panesā Bhagavatā vācā: “na tāvāhaṃ pāpima parinibbāyissāmi, yāva me bhikkhunīyo na sāvikā bhavissanti viyattā vinītā visāradā yogakkhemā bahussutā dhammadharā dhammānudhammapaṭipannā sāmīcipaṭipannā anudhammacāriniyo sakaṃ ācariyakaṃ uggahetvā ācikkhissanti desessanti paññapessanti paṭṭhapessanti vivarissanti vibhajissanti uttānī karissanti uppannaṃ parappavādaṃ sahadhammena suniggahitaṃ niggahetvā sappāṭihāriyaṃ dhammaṃ desessantī”-ti. ⁵ Santi kho pana [PTS Page 064] [\q 64/] bhante etarahi bhikkhuniyo Bhagavato sāvikā viyattā vinītā visāradā yogakkhemā bahussutā dhammadharā dhammānudhammapaṭipannā sāmīcipaṭipannā anudhammacāriniyo sakaṃ ācariyakaṃ uggahetvā ācikkhanti desenti paññapenti paṭṭhapenti vivaranti vibhajanti uttāniṃ karonti uppannaṃ parappavādaṃ sahadhammena suniggahitaṃ niggahetvā sappāṭihāriyaṃ dhammaṃ desentī”-ti. Parinibbātu bhante Bhagavā, parinibbātu Sugato, parinibbānakālo dāni bhante Bhagavato.

Bhāsitā kho panesā Bhagavato vācā: “na tāvāhaṃ pāpima parinibbāyissāmi yāva me upāsakā na sāvakā bhavissanti, viyattā vinītā visāradā yogakkhemā bahussutā dhammadharā dhammānudhammapaṭipannā sāmīcipaṭipannā anudhammacārino sakaṃ ācariyakaṃ uggahetvā ācikkhissanti desessanti paññapessanti paṭṭhapessanti vivarissanti vibhajissanti uttānī karissanti uppannaṃ parappavādaṃ sahadhammena suniggahitaṃ niggahetvā sappāṭihāriyaṃ dhammaṃ desessantī”-ti. Santi kho pana bhante etarahi upāsakā Bhagavato sāvakā viyattā vinītā visāradā yogakkhemā bahussutā dhammadharā dhammānudhammapaṭipannā sāmīcipaṭipannā anudhammacārino sakaṃ ācariyakaṃ uggahetvā ācikkhanti desenti paññapenti paṭṭhapenti vivaranti vibhajanti uttāniṃ karonti uppannaṃ parappavādaṃ sahadhammena suniggahitaṃ niggahetvā sappāṭihāriyaṃ dhammaṃ desenti. Parinibbātu bhante Bhagavā, parinibbātu Sugato, parinibbānakālo dāni bhante Bhagavato.

5. Bhāsitā kho panesā Bhagavato vācā: “na tāvāhaṃ pāpima parinibbāyissāmi, yāva me upāsikā na sāvikā bhavissanti viyattā vinītā visāradā yogakkhemā bahussutā dhammadharā dhammānudhammapaṭipannā sāmīcipaṭipannā anudhammacāriniyo sakaṃ ācariyakaṃ uggahetvā ācikkhissanti desessanti paññapessanti paṭṭhapessanti vivarissanti vibhajissanti uttānī karissanti uppannaṃ parappavādaṃ sahadhammena suniggahitaṃ niggahetvā sappāṭihāriyaṃ dhammaṃ desessantī”-ti. Santi kho pana bhante etarahi upāsikā Bhagavato sāvikā viyattā vinītā visāradā yogakkhemā bahussutā dhammadharā dhammānudhammapaṭipannā sāmīcipaṭipannā anudhammacāriniyo vinītā visāradā yogakkhemā bahussutā dhammadharā dhammānudhammapaṭipannā sāmīcipaṭipannā anudhammacāriniyo sakaṃ ācariyakaṃ uggahetvā ācikkhanti desenti paññapenti paṭṭhapenti vivaranti vibhajanti uttāniṃ karonti uppannaṃ parappavādaṃ sahadhammena suniggahitaṃ niggahetvā sappāṭihāriyaṃ dhammaṃ desenti.” Parinibbātu bhante Bhagavā, parinibbātu Sugato, parinibbānakālo dāni bhante Bhagavato.

[BJT Page 254] [\x 254/]

6. Bhāsitā kho panesā Bhagavato vācā: “na tāvāhaṃ pāpima parinibbāyissāmi, yāva me idaṃ brahmacariyaṃ na iddhañ-ceva bhavissati thitañ-ca vitthārikaṃ bāhujaññaṃ puthubhūtaṃ yāvad-eva manussehi suppakāsitan”-ti. Etarahi kho pana bhante Bhagavato brahmacariyaṃ iddhañ-ceva thitañ-ca vitthārikaṃ bāhujaññaṃ puthubhūtaṃ yāvad-eva manussehi suppakāsitaṃ. Parinibbātu dāni bhante Bhagavā, parinibbātu Sugato, parinibbānakālo dāni bhante Bhagavato” ti.

Evaṃ vutte Bhagavā Māraṃ pāpimantaṃ etad-avoca: “appossukko tvaṃ pāpima hohi. Na ciraṃ Tathāgatassa parinibbānaṃ bhavissati. Ito tiṇṇaṃ māsānaṃ accayena Tathāgato parinibbāyissatī”-ti. Atha kho Bhagavā Cāpāle cetiye sato sampajāno āyusaṅkhāraṃ ossajji. Ossaṭṭhe ca Bhagavatā āyusaṅkhāre mahābhūmicālo ahosi, bhīṃsanako lomahaṃso, devadundubhiyo ca eliṃsu.

7. Atha kho Bhagavā etam-atthaṃ viditvā tāyaṃ velāyaṃ imaṃ udānaṃ udānesi:

1111s21212 Vetālīya x4 ⁶
“Tulam-atulañ-ca sambhavaṃ

112211|22111
Bhavasaṅkhāram-avassajji ⁷ muni,

A2211|21212
Ajjhattarato samāhito

A1211111|21212
Abhindi kavacam-ivattasambhavan”-ti. ⁸

6-2: Jaṭilasuttaṃ (52)

1. Evaṃ me sutaṃ: ekaṃ samayaṃ Bhagavā Sāvatthiyaṃ viharati Pubbārāme Migāramātupāsāde. Tena kho pana [PTS Page 065] [\q 65/] samayena Bhagavā sāyanhasamayaṃ patisallāṇā vuṭṭhito bahidvārakoṭṭhake nisinno hoti. Atha kho rājā Pasenadi Kosalo yena Bhagavā tenupasaṅkami, upasaṅkamitvā Bhagavantaṃ abhivādetvā ekamantaṃ nisīdi. Tena kho pana samayena satta ca jaṭilā, satta ca nigaṇṭhā, satta ca acelakā, satta ca ekasāṭakā, satta ca paribbājakā, parūḷhakacchanakhalomā khārivividham-ādāya Bhagavato avidūre atikkamanti.

[BJT Page 256] [\x 256/]

2. Addasā kho rājā Pasenadi Kosalo te satta ca jaṭile, satta ca nigaṇṭhe, satta ca acelake, satta ca ekasāṭake, satta ca paribbājake, parūḷhakacchanakhalome khārivividham-ādāya Bhagavato avidūre atikkamante. Disvāna uṭṭhāyāsanā ekaṃsaṃ uttarāsaṅgaṃ karitvā dakkhiṇaṃ jāṇumaṇḍaṃ paṭhaviyaṃ nihantvā yena te satta ca jaṭilā, satta ca nigaṇṭhā, satta ca acelakā, satta ca ekasāṭakā, satta ca paribbājakā tenañjaliṃ paṇāmetvā tikkhattuṃ nāmaṃ sāvesi: “rājāhaṃ bhante Pasenadi ⁹ Kosalo” ti.

3. Atha kho rājā Pasenadi Kosalo acirapakkantesu tesu sattasu ca jaṭilesu, sattasu ca nigaṇṭhesu, sattasu ca acalekesu, sattasu ca ekasāṭakesu, sattasu ca paribbājakesu, yena Bhagavā tenupasaṅkami, upasaṅkamitvā Bhagavantaṃ abhivādetvā ekamantaṃ nisīdi. Ekamantaṃ nisinno kho rājā Pasenadi Kosalo Bhagavantaṃ etad-avoca: “ye ca kho bhante loke Arahanto vā arahattamaggaṃ vā samāpannā, ete tesaṃ ¹⁰ aññatarā”-ti.

“Dujjānaṃ kho panetaṃ mahārāja tayā gihinā kāmabhoginā puttasambādhasayanaṃ ajjhāvasantena Kāsikacandanaṃ paccanubhontena mālāgandhavilepanaṃ dhārayantena jātarūparajataṃ sādiyantena: “ime vā Arahanto ime vā arahattamaggaṃ samāpannā”-ti. Saṃvāsena kho mahārāja sīlaṃ veditabbaṃ, tañ-ca kho dīghena addhunā, na ittarena manasikarotā no amanasikaroti, paññavatā no duppaññena. Saṃvohārena ¹¹ kho mahārāja soceyyaṃ veditabbaṃ, tañ-ca kho dīghena addhunā, na ittarena, manasikarotā no amanasikarotā, paññavatā no duppaññena. Āpadāsu kho mahārāja thāmo veditabbo, so ca kho dīghena addhunā, na ittarena, manasikarotā no amanasikarotā, paññavatā no duppaññena. Sākacchāya kho mahārāja paññā veditabbā, sā ca kho dīghena addhunā, na ittarena, manasikarotā no amanasikarotā, paññavatā no duppaññenā”-ti.

[PTS Page 066] [\q 66/]

4. “Acchariyaṃ bhante, abbhutaṃ bhante, yāva subhāsitañ-cidaṃ bhante Bhagavatā: dujjānaṃ kho panetaṃ mahārāja, tayā gihinā kāmabhoginā puttasambādhasayanaṃ ajjhāvasantena Kāsikacandanaṃ paccanubhontena mālāgandhavilepanaṃ dhārayantena jātarūparajataṃ sādiyantena: “ime vā Arahanto ime vā arahattamaggaṃ samāpannā”-ti. Saṃvāsena kho mahārāja, sīlaṃ veditabbaṃ, tañ-ca kho dīghena addhunā, na ittahena, manasikarotā no amanasikaroti, paññavatā no duppaññena. Saṃvohārena kho mahārāja, soceyyaṃ veditabbaṃ, tañ-ca kho dīghena addhunā na ittarena, manasikarotā no amanasikarotā, paññavatā no duppaññena. Āpadāsu kho mahārāja, thāmo veditabbo, so ca kho dīghena addhunā na ittarena, manasikarotā no amanasikarotā, paññavatā no duppaññena. Sākacchāya kho mahārāja paññā veditabbā, sā ca kho dīghena addhunā, na ittarena, manasikarotā no amanasikarotā, paññavatā no duppaññenā”-ti. Ete bhante mama purisā corā ocarakā janapadaṃ ocaritvā āgacchanti ¹². Tehi paṭhamaṃ otiṇṇaṃ ahaṃ pacchā otarissāmi. ¹³ Idāni te bhante taṃ rajojallaṃ pavāhetvā nhātā suvilittā kappitakesamassū odātavatthavasanā pañcahi kāmaguṇehi samappitā samaṅgībhūtā paricāressantī”-ti.

5. Atha kho Bhagavā etam-atthaṃ viditvā tāyaṃ velāyaṃ imaṃ udānaṃ udānesi:

1212|1221||2211|1212 pathyā
“Na vāyameyya sabbattha ~ nāññassa puriso siyā.

2222|1121||2211 |1212 vip 5
Nāññaṃ nissāya jiveyya ~ dhammena na vaṇiṃ care” ti ¹⁴.

[BJT Page 258] [\x 258/]

6-3: Paccavekkhanasuttaṃ (53)

1. Evaṃ me sutaṃ: ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme. Tena ko pana samayena Bhagavā attano aneke pāpake akusale dhamme pahīṇe paccavekkhamāno nisinno ¹⁵ hoti. Aneke ca kusale dhamme bhāvanāya pāripūriṃ gate.

2. Atha kho Bhagavā etam-atthaṃ viditvā tāyaṃ velāyaṃ imaṃ udānaṃ udānesi:

1A122|1221||2122|1211 pathyā
“Ahu pubbe tadā nāhu ~ nāhu pubbe tadā ahu,

12111|1211||1211|1212 Anuṭṭhubha
Na cāhu na ca bhavissati ~ na cetarahi vijjatī”-ti.

6-4: Paṭhamanānātitthiyasuttaṃ (54)

1. Evaṃ me sutaṃ: ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme. Tena kho pana samayena sambahulā nānātitthiyā samaṇabrāhmaṇaparibbājakā ¹⁶ [PTS Page 067] [\q 67/] Sāvatthiyaṃ paṭivasanti, nānādiṭṭhikā nānākhantikā nānārucikā nānādiṭṭhinissayanissitā.

Santeke samaṇabrāhmaṇā evaṃvādino evaṃdiṭṭhino “sassato loko, idam-eva saccaṃ mogham-aññan”-ti. (1)

Santi paneke samaṇabrāhmaṇā evaṃvādino evaṃdiṭṭhino “asassato loko, idam-eva saccaṃ mogham-aññan”-ti. (2)

Santeke samaṇabrāhmaṇā evaṃvādino evaṃdiṭṭhino “antavā loko, idam-eva saccaṃ mogham-aññan”-ti. (3)

Santi paneke samaṇabrāhmanā evaṃvādino evaṃdiṭṭhino “anantavā loko, idam-eva saccaṃ mogham-aññan”-ti (4)

Santeke samaṇabrāhmaṇā evaṃvādino evaṃdiṭṭhino “taṃ jīvaṃ taṃ sarīraṃ, idam-eva saccaṃ mogham-aññan”-ti. (5)

Santi paneke samaṇabrāhmaṇā evaṃvādino evaṃdiṭṭhino “aññaṃ jīvaṃ aññaṃ sarīraṃ, idam-eva saccaṃ mogham-aññan”-ti. (6)

[BJT Page 260] [\x 260/]

Santeke samaṇabrāhmaṇā evaṃvādino evaṃdiṭṭhino “hoti Tathāgato param-maranā, idam-eva saccaṃ mogham-aññan”-ti (7)

Santi paneke samaṇabrāhmaṇā evaṃvādino evaṃdiṭṭhino “na hoti Tathāgato param-maranā, idam-eva saccaṃ mogham-aññan”-ti (8)

Santeke samaṇabrāhmaṇā evaṃvādino evaṃdiṭṭhino “hoti ca na hoti ca Tathāgato param-maranā, idam-eva saccaṃ mogham-aññan”-ti (9)

Santi paneke samaṇabrāhmaṇā evāṃvādino evaṃdiṭṭhino “neva hoti ca, na na hoti ca Tathāgato param-maraṇā, idam-eva saccaṃ mogham-aññan”-ti. (10)

Te bhaṇḍanajātā kalahajātā vivādāpannā aññam-aññaṃ mukhasattīhi vitudantā viharanti “ediso dhammo nediso dhammo, nediso dhammo ediso dhammo” ti.

2. Atha kho sambahulā bhikkhū pubbanhasamayaṃ nivāsetvā pattacīvaram-ādāya Sāvatthiṃ piṇḍāya pavisiṃsu. Sāvatthiyaṃ piṇḍāya caritvā pacchābhattaṃ piṇḍapātapaṭikkantā yena Bhagavā tenupasaṅkamiṃsu, upasaṅkamitvā Bhagavantaṃ abhivādetvā ekamantaṃ nisīdiṃsu, ekamantaṃ nisinnā kho te bhikkhū Bhagavantaṃ etad-avocuṃ: “idha bhante sambahulā nānātitthiyā samaṇabrāhmaṇaparibbājakā Sāvatthiyaṃ paṭivasanti nānādiṭṭhikā nānākhantikā nānārucikā nānādiṭṭhinissayanissitā.